ကုသိုလ် စွမ်းအား

 ကုသိုလ် စွမ်းအား

💟😊😇☸️🥰😊😇

ဘာကိုအကြောင်းပြုပြီး

ပြုတဲ့ကုသိုလ်ပဲဖြစ်ဖြစ်

ကုသိုလ်မှန်သမျှ-

*အနဝဇ္ဇ=အပြစ်ကင်းခြင်း၊

*သုခဝိပါက=ချမ်းသာကျိုးပေးခြင်းဆိုတဲ့

ကောင်းကျိုးနှစ်မျိုး ရတာချည်းပါပဲ။

ကံတို့ရဲ့စွမ်းဆောင်ရည်(ကိစ္စ)အရ..

ဘယ်ကုသိုလ်ကံမဆို-

*ဇနက=ကောင်းကျိုးအသစ်ဖြစ်စေခြင်း၊

*ဥပထမ္ဘက=ပြုပြီးတဲ့ကံများ အကျိုးပေးခွင့်

ရအောင်ကူညီခြင်း၊

*ဥပပီဠက=ဆန့်ကျင်ဘက်ကန်တို့ရဲ့

အကျိုးပေးခွင့်ကိုဟန့်တားခြင်း၊

*ဥပဃာတက=ဆန့်ကျင်ဘက်အကုသိုလ်ကို

အမြစ်ပြတ်ဖယ်ရှားခြင်း..ဆိုတဲ့

စွမ်းရည်လေးမျိုးရှိကြတာချည်းဖြစ်လို့

ကံဆိုးတွေကိုဟန့်တားခြင်းနဲ့

အပြစ်ကင်းစေပြီး

ကံကောင်းတွေကိုထောက်ပံ့ထင်ရှားစေခြင်းနဲ့

ကောင်းကျိုးပေးတာပါ။

ဘာ့အကြောင်းကြောင့်ဖြစ်ဖြစ်

အခွင့်ကြုံခဲ့ရင်

ကုသိုလ်မှန်သမျှ

ပြုကြ!

၂၄.၉.၂၂

💟😊😇☸️😊😇🥰💟🥰😊😇☸️

 အပင်ပေါ်မှာ ရှိနေ ရှိနေ ...

မြေပြင်ထက်ကို ကြွေဆင်း ကြွေဆင်း ...
သစ်ရွက်တစ်ရွက်ရဲ့ တန်ဖိုးဟာ
သူ့နေရာနဲ့သူ အသုံးဝင်ပါတယ် ...

ဒီလိုပဲ
လူတစ်ယောက် အဆင်ပြေအောင်မြင်နေတဲ့ အချိန်ဖြစ်ဖြစ် ...
အားနည်း ရှုံးနိမ့်နေတဲ့ အခါဖြစ်ဖြစ် ...
သူ့နေရာနဲ့သူ လူ့လောကကြီးရဲ့ တစ်နေရာရာကို အကျိုးပြုနေတာပါပဲ ...

ကိုယ်အဆင်ပြေနေချိန်
တစ်ဖက်သားနိမ့်ကျနေတဲ့အခါ
အထင်အမြင်သေးပြီး မဆက်ဆံပါနဲ့ ...

လောကဓံဆိုတာ
လူ့လောကမှာ နေထိုင်အသက်ရှင်နေကြသူအားလုံးအတွက် ဖြစ်ပျက်နေတာမို့ ...
ဘယ်လိုအခြေအနေကိုပဲ ရောက်ရောက် ...
ကိုယ်ချင်းစာစိတ်လေးနဲ့ပဲ ရှင်သန်တတ်ရင် အကောင်းဆုံးပေါ့ ...

#hopeful
#morrow

ခလုတ်လည်း ဖြစ်ခဲ့တယ်

 ခလုတ်လည်း ဖြစ်ခဲ့တယ်

ခလုတ်လည်း တိုက်ခဲ့တယ်..

လူဟာ ဗီလိန်တစ်ခန်း ဇာတ်လိုက်တစ်ခန်း

ဘယ်တော့မှ အပြည့်မသာတဲ့ လမင်းတစ်ခြမ်းပေါ့..

အနီးဆုံး သစ်သီးဖြစ်တော့လည်း

လက်ဆော့ခြေဆော့ အခူးခံရတယ် ..

စာအုပ်အလယ်ခေါင်ဖြစ်တော့လည်း

ဗြုတ်ခနဲမြည်အောင် အဖြုတ်ခံရတယ် ..

အလွမ်းဟာ

မစည်ကားအပ်တဲ့အရပ်ဆိုပေမယ့်

ဘယ်လမ်းက ပြန်ပြန်

ပျော်ရွှင်ခြင်းဆီ ထပ်မရောက်တော့တဲ့အခါ ..

ငှက်ကလေးရေ

ငါ့အိမ်လေးကို ငါ လွမ်းတယ် ..

-အေးရိပ်-

လွမ်းနေရင်တောင်

လွမ်းနေရင်တောင်

လွမ်းတယ်မပြောတော့ဘူး

ခင်ဗျားဖြစ်တည်မှုမှာ

ကျွန်တော့်တစ်စုံတစ်ရာကိုမှ မလိုအပ်ခဲ့တာပဲ

ကွန်းခိုမိတဲ့ တံစက်မြိတ်လေးကို

ခဏအေးစေခဲ့လို့ပဲ 

ကျေးဇူးတင်ပါရစေ

တစ်ယောက်တည်းလာပြီး

တစ်ယောက်တည်းပြန်ပါဦးမယ် 

ဘယ်အရာကိုမှ သိမ်းမထားချင်ခဲ့ပေမယ့်

ဖုန်းနံပါတ်လေးကိုတော့ ဖျက်မပစ်ရက်ခဲ့ဘူး

စိတ်ချပါ

မတော်တဆဖြစ်စေ

အကြောင်းတိုက်ဆိုင်လို့ ပြန်ဆုံကြတဲ့အခါ

ကျွန်တော့်ကမ္ဘာလေး 

ခင်ဗျားထားသွားတုန်းကထက်

ပိုပြီး ချစ်ခင် နှစ်လိုဖွယ် အရပ်ဒေသလေးအဖြစ် 

တည်ရှိနေစေရပါမယ်လို့

ကတိပေးပါတယ်

ဒါ မေတ္တာတရားအပေါ်

ကျွန်တော့် ဖွင့်ဆိုမှုပါ

-အေးရိပ်-

ဟန်ဆောင်ခြင်းများ ကင်းပါစေ

ဟန်ဆောင်ခြင်းများ ကင်းပါစေ

★★★★★★★★★★★★★★★

လူအထင်အကြီးခံရဖို့လောက်နဲ့တော့ 

ကိုယ့်ကိုယ်ကို ဟန်ဆောင်ပြီး 

အလိမ်အကောက်တွေ မလုပ်မိပါစေနဲ့။ 

အထင်ကြီးတော့လည်း 

ဘယ်လောက်အထင်ကြီးနိုင်မှာလဲပေ့ါ။ 

ချီးမွန်း (ရ)ရက်၊ ကဲ့ရဲ့ (ရ)ရက်လောက်ပါပဲ။ 

မရှိဘဲနဲ့ ရှိချင်ယောင်ဆောင်ပြီး 

အထင်ကြီးအောင် ဖန်တီးနေမှုရဲ့ နောက်ကွယ်မှာ 

ကိုယ့်ကိုယ်ကို နစ်မွန်းစေတဲ့အပြုအမူတွေနဲ့ 

အပြစ်တွေကိုသာ ဆက်တိုက်လုပ်ဖြစ်နေတတ်ပါတယ်။ 

ပိုဆိုးတာက သူများက အထင်ကြီးခံရပြီးမှ 

အထင်သေးသွားရင် ပြန်ပြီးအထင်ကြီးဖို့

မဖြစ်နိုင်တတ်ပါဘူး။ အထင်သေးထားပြီးမှ 

အထင်ကြီးသွားတာက ရိုသေလေးစားမှုကို 

ပိုပြီးခိုင်မြဲနေတတ်ပါတယ်။ အရေးကြီးဆုံးက 

သူများအထင်ကြီးဖို့ထက် ကိုယ့်ကိုယ်ကို ပြန်ဆင်ခြင်လိုက်တိုင်း

 အပြည့်အစုံကြီး မဟုတ်တာတောင်မှ

“မဆိုးဘူး”ဆိုတဲ့ ခံယူချက်မျိုး ရရှိစေဖို့က 

အရေးအကြီးဆုံးပါပဲ။ 

ဘာဖြစ်လို့လဲဆိုတော့ ကိုယ်ဘာလဲ၊ 

ကိုယ်ဘာလုပ်နေလဲဆိုတာ ကိုယ်ကိုယ်တိုင် 

အသိဆုံး ဖြစ်နေလို့ပါပဲ။

အသိရှိပါ၊ သတိမလွတ်ပါစေနဲ့။

[မနာပဒါယီ အရှင်ဝိစိတ္တ (ဒိုက်ဦး)]

GoogleDrive

Google Drive (ဂူဂဲလ် ဒရိုက်ဖ်) အကြောင်း

ကျွန်တော်တို့တွေရဲ့ ဖုန်းအများစုမှာ Google က ထုတ်ထားတဲ့ မိုဘိုင်းဖုန်း အပ်ပလီကေးရှင်းတွေ ပါဝင်ပါတယ်။ ဒါပေမယ့် အများစုသော ကျွန်တော်တို့တွေက အဆိုပါ အပ်ပလီကေးရှင်းတွေကို ဘယ်နေရာမှာ ဘယ်လိုအသုံးပြုလို့ရတယ်ဆိုတာ မသိကြပါဘူး။ အချို့ဆိုရင် ပါမှန်းတောင် မသိကြပါဘူး။

အခုဆောင်းပါးမှာတော့ Google Drive (ဂူဂဲလ် ဒရိုက်ဖ်) အကြောင်းကို ပြောပြပေးသွားမှာဖြစ်ပါတယ်။ ဂူဂဲလ် ဒရိုက်ဖ်ဆိုတာက ကျွန်တော်တို့အများစုသိထားတဲ့ Memory Card (မမ်မိုရီ ကဒ်) လိုပါပဲ ဓာတ်ပုံတွေ၊ ဗီဒီယိုတွေကို သိမ်းဆည်းလို့ရတဲ့ နေရာပဲဖြစ်ပါတယ်။ မမ်မိုရီကဒ်နဲ့ မတူညီတာကတော့ ဂူဂဲလ်ဒရိုက်ဖ်ကို အသုံးပြုဖို့ရန်အတွက်ဆိုရင် အင်တာနက်ချိတ်ဆက်ထားဖို့ လိုအပ်တာပဲဖြစ်ပါတယ်။

ဆိုတော့ ဖုန်းထဲမှာပါတဲ့ ဂူဂဲလ်ဒရိုက်ဖ်ကို ချက်ချင်းအသုံးပြုလို့ရပါသလားဆိုပြီး မေးစရာရှိလာပါတယ်။ ဟုတ်ကဲ့ အင်တာနက်ချိတ်ဆက်ပြီးတာနဲ့ ဂူဂဲလ်ဒရိုက်ဖ်ကို အသုံးပြုလို့ရပါတယ်။ ဒါပေမယ့် Google Account (ဂူဂဲလ်အကောင့်) ရှိဖို့တော့ မဖြစ်မနေ လိုအပ်ပါတယ်။ ဂူဂဲလ်ဒရိုက်ဖ်ဟာ ဂူဂဲလ်ကုမ္ပဏီကထုတ်ထားတဲ့ ကုန်ပစ္စည်းတစ်ခုဖြစ်ပါတယ်။ ဂူဂဲလ်ကထုတ်ထားတဲ့ ကုန်ပစ္စည်းတွေ၊ ဂူဂဲလ်ကပေးနေတဲ့ ဝန်ဆောင်မှုတွေကို အသုံးပြုဖို့ရန်အတွက်ဆိုရင် ဂူဂဲလ်အကောင့်တစ်ခုရှိဖို့တော့ လိုအပ်ပါတယ်။ ဒါက သဘာဝကျတယ်လို့ ပြောရပါမယ်။

ဂူဂဲလ်ဒရိုက်ဖ်ကို ဘယ်နေရာတွေမှာ အသုံးပြုသလဲဆိုတာ မပြောခင်မှာ မေးခွန်းတစ်ခုရှိပါမယ်။ ဖုန်းပျောက်သွားလို့ပဲဖြစ်ဖြစ်၊ မမ်မိုရီကဒ်ပျက်သွားလို့ပဲဖြစ်ဖြစ်၊ Memory Stick (မမ်မိုရီစတစ်ခ်) ပျောက်သွားလို့ပဲဖြစ်ဖြစ် အနှစ်နှစ်အလလက ရိုက်ထားတဲ့ ဓာတ်ပုံတွေပျက်သွားတာမျိုး ကြုံတွေ့ဖူးပါသလား။ ပြန်မရနိုင်တော့ဘူးဆိုတဲ့ အသိကြောင့် ပူဆွေးသောက ဝမ်းနည်းခဲ့ရဖူးပါသလား။ ဒါဆိုရင်တော့ ဂူဂဲလ်ဒရိုက်ဖ်ရှိဖို့ လိုအပ်နေပါပြီ။

ဂူဂဲလ်ဒရိုက်ဖ်ဆိုတာက ဓာတ်ပုံတွေ၊ ဗီဒီယိုတွေ၊ ဒစ်ဂျစ်တယ်စာအုပ်တွေ အစရှိတဲ့ File (ဖိုင်လ်) အမျိုးမျိုးကို အခမဲ့သိမ်းဆည်းလို့ရတဲ့ အင်တာနက်ပေါ်က နေရာလေးတစ်ခုဖြစ်ပါတယ်။ ဒါ့အပြင် မိမိသိမ်းဆည်းထားတဲ့ ဖိုင်လ်တွေကိုလည်း မိတ်ဆွေသူငယ်ချင်းတွေသာမက အင်တာနက်ပေါ်က လူတိုင်းစီကို ဝေမျှလို့ရအောင်ပါ လုပ်ဆောင်ပေးထားပါတယ်။ ဘော်ဒါတွေစုပြီး ချောင်းသာကို အပန်းဖြေသွားကြတယ်၊ ဓာတ်ပုံတွေရိုက်တယ်။ Facebook Messenger ကနေ ပုံတွေပြန်ရှယ်တော့ ဝါးဝါးကြီးတွေ၊ ပီပီပြင်ပြင်မရှိတဲ့ ပုံတွေ ကိုယ့်စီရောက်လာတယ်။ အဲ့သလို မဖြစ်ချင်ဘူးဆိုရင် Zapya တို့နဲ့ ရှယ်မယ်ဆိုလည်း မရဘူးလားဆိုတော့ ရတယ်။ ဒါပေမယ့် ပျောက်သွားရင်၊ ပျက်သွားရင် ပြန်ရဖို့က မသေချာတော့ဘူး။ ဂူဂဲလ်ဒရိုက်ဖ်ပေါ်မှာတင်ပြီး ရှယ်မယ်ဆိုရင် တစ်ချက်ခုတ် အချက်ပေါင်းများစွာ ပြတ်မှာ အမှန်ပဲ။

ဖုန်းထဲမှာရှိတဲ့ ပုံတွေ ပျက်သွားသည့်တိုင် ဂူဂဲလ်ဒရိုက်ဖ်ထဲမှာ ရှိနေသေးသည့်အတွက်ကြောင့် အင်တာနက်ချိတ်ဆက်ထားသည့် အချိန်အခါမရွေး ပြန်ကြည့်၊ ပြန်ဝေမျှလို့ ရနေမှာဖြစ်ပါတယ်။ ဆိုတော့ ကျွန်တော်တို့ စပြီးသုံးတော့မယ်ဆိုပါစို့။ ဘယ်လောက်အထိ အခမဲ့အသုံးပြုလို့ရမလဲ။ ဘယ်လောက်ပမာဏ အခမဲ့အသုံးပြုခွင့်ရှိမလဲ။ ဘယ်လောက်အထိ အခမဲ့ အသုံးပြုခွင့်ရမလဲဆိုတာတော့ အတိအကျ မပြောတက်ပါဘူး။ ဝန်ဆောင်မှု စတင်ပေးခဲ့တဲ့ ၂၀၁၂ ခုနှစ်၊ ဧပြီလ ၂၄ ရက်ကစပြီး အခုလက်ရှိအချိန်ထိမှာတော့ 15 GB တိတိ အခမဲ့ သိမ်းဆည်းသိုလှောင်ခွင့် ရနေပါတယ်။

ဆက်လက်ဖော်ပြပါဦးမည်။

ယသော်ဓရာ

ဟောဒီ ဘဒ္ဒကမ္ဘာမှာ ...

အချစ်တတ်ဆုံးအမျိုးသမီး ၊ ရိုမန်တစ်အဆန်ဆုံးအမျိုးသမီးက 

ဘုရားအလောင်းတော် သိဒ္ဓထ္ထမင်းသားရဲ့ ကြင်ယာတော်

ယသော်ဓယာဒေဝီ ပါပဲ 

ဒီပင်္ကရာဘုရားရှင်လက်ထက်မတိုင်မီ ရှေ့ဘုရားရှင်တစ်ဆူလက်ထက်မှာကထဲက သူကပါရမီဖြည့်ဖက်အဖြစ် ဆုတောင်းခဲ့တယ် ။

ဒီပင်္ကရာဘုရားရှင်လက်ထက်မှာ ဗျာဒိတ်ပေးတော့လည်း သုမေဓာရှင်ရသေ့လေးကို ချစ်ခင်မြတ်နိုးလွန်းလို့ ပါရမီဖြည့်ဖက်ဖြစ်ပါရစေလို့ ဆုတောင်းခဲ့ပြန်တယ် ။

တကယ့် Platonic Love 

နောက်ဆုံးဘဝ ကြင်ယာတော်သိဒ္ဓထ္ထမင်းသားတောထွက်တော်မူသွားတဲ့အခါကျတော့

အထောက်တော်တွေကို စေလွှတ်ပြီးစုံစမ်းခိုင်းတယ်

သိဒ္ဓထ္ထမင်းသားက ဆွမ်းတစ်နပ်ပဲစားတော့တယ်ဆိုရင် သူလည်း တစ်နပ်ပဲစားတယ်

သိဒ္ဓထ္ထမင်းသားက သစ်သီးကိုပဲ သုံးဆောင်တော့တယ်ဆိုရင် သူလည်းသစ်သီးကိုပဲ စားတော့တယ်။

သူ့ချစ်သူသိဒ္ဓထ္ထမင်းသားဘုရားဖြစ်ဖို့ကျင့်ကြံအားထုတ်ရင်းမြေမှာအိပ်တယ်လို့ သူသိရရင် ... 

သူလည်း သလွန်ပေါ်ကဆင်းပြီး မြေမှာပဲဆင်းအိပ်တယ် ။

တကယ့်ကိုပါရမီဖြည့်ဖက်ပီသစွာ  သူ နေထိုင်ခဲ့တယ် ။

ပထမဆုံးအကြိမ် ... 

ဘုရားရှင်က ကပ္ပိလဝတ်ကို ကြွတော်မူလာတော့ ..

ဘုရားရှင်ရဲ့ ခြေတော်စုံကို သူ့ရဲ့ဆံပင်တွေနဲ့ပွတ်ပြီး ဝမ်းနည်း ဝမ်းသာသည်းထန်စွာငိုကြွေးတော့တယ် ။

ခွဲခွာခဲ့ရတာ ၈ နှစ်လောက်ကြာခဲ့ပြီလေ

သားတော်ရာဟုလာကို ဒါ မင်းရဲ့အဖေပဲ အမွေသွားတောင်းချေလို့ ထည့်ပေးလိုက်တယ် ။

တကယ်က အဖေနဲ့သားကို အတူဆုံစေချင်တဲ့စေတနာလို့ထင်မိတယ် ။

ဒီလိုနဲ့ သူကိုယ်တိုင်လည်း မြတ်စွာဘုရားရဲ့ တရားတွေကိုနာကြားရပြီး  သူလည်းရဟန္တာဖြစ်တော်မူတယ် ။

ယသော်ဓယာဒေဝီထေရီမဟာ ပရိနိဗ္ဗာန်ပြုရမယ့်အချိန်ဆိုတာသိရပြီဆိုတာနဲ့ တရားအားထုတ်ဖော် ထေရီမတစ်ထောင်ကို ခေါ်ပြီး ဘုရားဆီကိုကြွလာခဲ့တယ် ။

" ဒီနေ့ တပည့်တော် ပရိနိဗ္ဗာန် ပြုပါတော့မယ်အရှင်ဘုရား " လို့ လျှောက်တယ် ။

ပြီးတော့ တစ်ဆယ့်ခြောက်သင်္ချေနဲ့ ကမ္ဘာတစ်သိန်းပတ်လုံး ဘဝပေါင်း များစွာ များစွာ ချစ်သူအဖြစ် လင်ယောကျာ်းအဖြစ် ချစ်မြတ်နိုးခဲ့ရတဲ့ ပါရမီဖြည့်ခဲ့ရတဲ့သူကို နောက်ဆုံးကြည့်ခြင်းနဲ့ ခုနှစ်ကြိမ်ပတ်ပြီး မမှိတ်မသုန်ကြည့်နေခဲ့တယ် ။

ပြီးတော့ သံသရာမှာ ဘယ်တော့မှ ပြန်ဆုံမှာမဟုတ်တော့တဲ့သူနှစ်ယောက်ရဲ့ နောက်ဆုံးနှုတ်ဆက်စကား ( ဥဒါန်း) တစ်ခွန်းကိုဆိုလိုက်တယ် ...

" အရှင်ဘုရား ...

တပည့်တော်မ ဟာ ... အရှင်ဘုရားကို ဘဝအဆက်ဆက် ပါရမီဖြည့်ဖက်အဖြစ် အမြဲတမ်းအတူတူရှိနေခဲ့ပါတယ်ဘုရား

အရှင်ဘုရားမဖြစ်ခင်ဘဝ ကြီးကျယ်မြင့်မြတ်တဲ့ဘဝတွေကို အတူတကွခံစား စံစားခဲ့ကြသလို ...

ဆင်းရဲဒုက္ခတွေကို အတူခံစားခဲ့ကြပါတယ် ဘုရား 🙏🙏🙏

ချမ်းသာခြင်းကို အတူခံစားခဲ့ကြသလို ...

 ဆင်းရဲဒုက္ခကြုံရတဲ့အခါမှာလည်း မငြိုငြင်ခဲ့ပါဘူးအရှင်ဘုရား ... " လို့ လျှောက်တယ် ။

ပြီးတော့ ကောင်းကင်ကိုစျာန်နဲ့ပျံကြွရင်း...

ဆင်ရုပ် ၊မြင်းရုပ် ၊သိကြားမင်းရုပ်၊နဂါးရုပ်၊ ဂဠုန်ရုပ်စတဲ့ ... နာနာရုပ်တွေကို သူ့ရဲ့တန်ခိုးနဲ့ဖန်ဆင်းပြီးမြတ်စွာဘုရားကို အထပ်ထပ်ပူဇော်တယ် ။

အဲဒီနောက် ကောင်းကင်မှာပဲ ပရိနိဗ္ဗာန်ပြုပြီး တေဇောဓာတ်မီး လောင်တော်မူတယ် ။

ယသော်ဓယာဒေဝီဟာ ကြီးကျယ်ခမ်းနားတဲ့ ချစ်ခြင်းများနဲ့ သံသရာတစ်လျှောက်လုံး ချစ်ခဲ့တဲ့သူ ... 

ကိုယ်ချစ်တဲ့သူကို နောင်ဘဝအထိ 

သံသရာအဆက်ဆက်ထိ ကောင်းစေလိုတဲ့ စေတနာနဲ့ မငြီးမငြူပါရမီဖြည့်ခဲ့တဲ့ 

အချစ်တတ်ဆုံးသူပါ ...

ကလျာဏမိတ္တတစ်ယောက်ရဲ့ ဖြည့်ဆည်းမှုတွေနဲ့ ကိုယ့်ချစ်သူကို သံသရာတစ်လျောက်လုံး အရှုံးအမြတ်မတွက်ပဲ ချစ်ပြသွားခဲ့တဲ့ ယသော်ဓယာဒေဝီဟာ

လောကီ လောကုတ္တရာ အခြေအနေ ၂ မျိုးစလုံးမှာ

အချစ်တတ်ဆုံး မိန်းမတစ်ယောက်အဖြစ်

မှတ်တမ်းတင်စရာဖြစ်သွားစေတော့တယ်

🌻🌻🌻  🌼🌼🌼🌼🌼  🌻🌻🌻

.{ Ref : ဆရာကြီးငွေဥဒေါင်း၏ ဗုဒ္ဓစာပန်းချီနှင့် 

ဆရာတော်အရှင်နန္ဒမာလာဘိဝံသ၏တရားတော် }

Credit : pandora